Të nderuar aplikues,

Ju njoftojmë se afati i aplikimit për bursën "Sevasti Qiriazi" ka përfunduar.

Aktualisht, komisioni është në proçesin e shqyrtimit të aplikimeve dhe të përzgjedhjes së fituesve. Pas përfundimit të këtij procesi, rezultatet do të publikohen në faqen tonë zyrtare dhe do t'u komunikohen edhe kandidatëve të përzgjedhur.

Ju falënderojmë për interesimin dhe ju urojmë suksese të gjithë aplikuesëve.
Kontribuo dhe ti 😊🙏
Kontribuo dhe ti😊
Nga shqiptarët për shqiptarët
Bursa nga Diaspora

"Sevasti Qiriazi"

Një investim sot, për një të ardhme nesër!
Bursa “Sevasti Qiriazi” është një program mbështetës i sjellë nga profesionistë shqiptarë që jetojnë dhe punojnë jashtë Shqipërisë, nën kujdesin e Diasporës për Shqipërinë e Lirë.

Qëllimi ynë është të ulim pengesat ekonomike për arsimin e lartë, duke ofruar mbështetje financiare, mentorim dhe akses në një rrjet profesionistësh.
Pse kjo bursë?
Nuk është talenti që mungon por rruga drejt mundësive
Si profesionistë që jetojmë dhe punojmë jashtë Shqipërisë, shumë prej nesh e dimë nga përvoja personale sa vendimtare janë arsimi dhe një profesion për të krijuar një jetë të qëndrueshme dhe për të pasur mundësi reale për të ecur përpara. Pikërisht për këtë arsye, donim të bënim diçka konkrete, jo vetëm të flisnim për nevojën e ndryshimit.

Në Shqipëri ka shumë vajza të përkushtuara dhe me dëshirë për t’u bërë mjeke, inxhiniere, studiuese, mësuese, sipërmarrëse apo drejtuese. Por për shumë prej tyre, vështirësitë ekonomike mbeten një pengesë serioze për vazhdimin e studimeve universitare.

Si diasporë, kemi mundësinë dhe përgjegjësinë të ulim këto pengesa dhe të kontribuojmë në mënyrë konkrete, duke krijuar mundësi të prekshme për vajzat që kanë aftësi dhe vullnet, por jo gjithmonë mbështetjen financiare.

Pse Sevasti Qiriazi?
Pioniere. Arsimtare. Vizionare. Guximtare.
Emri i Sevasti Qiriazi-Dako u zgjodh si "kumbarja" e kësaj burse sepse ajo përfaqëson, më qartë se kushdo tjetër, idenë që arsimi i vajzave nuk është luks, por themel i përparimit të shoqërisë.

Sevasti Qiriazi-Dako ishte një nga figurat më të shquara të historisë shqiptare të arsimit dhe emancipimit shoqëror. Ajo ishte patriote, arsimtare, autore dhe pioniere e arsimit për vajzat shqiptare.
Si gruaja e parë shqiptare që përfundoi studime universitare, qëllimi i Sevastisë nuk ishte thjesht arsimimi personal. Ajo e pa dijen si mjet për të hapur rrugë dhe për të tjera duke u përgatitur dhe kontribuar drejtpërdrejt në arsimimin e vajzave shqiptare.

Pikërisht për këtë arsye, pas përfundimit të studimeve u kthye në atdhe dhe, së bashku me vëllanë e saj Gjerasim Qiriazi, themeloi në vitin 1891 Shkollën e Vajzave në Korçë, shkollën e parë në gjuhën shqipe për vajzat.

Në frymën e Sevasti Qiriazit, kjo bursë është një vazhdim i një ideje të thjeshtë dhe të fuqishme: kur i jep një vajze mundësi për arsim, i jep një vendi më shumë shpresë për të ardhmen.
Mëso më shumë rreth Sevasti Qiriazi
Jemi këtu për të lënë gjurmë në botë. Përndryshe, pse do të ishim këtu?
Programi i bursës në praktikë
ARSIMI I VAJZAVE ËSHTË THEMELI I NJË KOMBI TË LIRË
  • Faza e parë
    Në fazën e parë të programit synojmë:

    🎯 Të mbledhim 6,000 €
    🎓 Të mbështesim 4 studente që nisin vitin akademik 2026
    🤝 Të ofrojmë mentorim dhe akses në një rrjet profesionistësh nga diaspora

    Programi është qëllimisht modest në fillim, por i ndërtuar për t’u zgjeruar me kohën, bazuar në rezultate dhe besim.
  • Përzgjedhja dhe transparenca
    Përzgjedhja e përfituesëve do të bazohet në:
    • merita akademike
    • nevojë ekonomike
    • motivim personal
    Procesi do të menaxhohet nga një komitet mbikëqyrës, i përbërë nga profesionistë të diasporës (lexo më poshtë).

    Angazhimi ynë për transparencë përfshin raportime të rregullta si për grupin kontribues ashtu edhe për publikun, mbi përdorimin e fondeve, si dhe komunikim të hapur mbi progresin e programit.
  • Administrimi
    100% e fondeve të mbledhura shkojnë drejtpërdrejt në fondin e bursës dhe përdoren vetëm për mbështetjen e përfitueseve. Kjo do të thotë se asnjë pjesë e dhurimeve nuk përdoret për pagesa, honorare apo shpenzime të brendshme të organizimit. Çdo kontribut synon të përkthehet në ndihmë konkrete për studentet.

    Puna dhe koordinimi për mbledhjen dhe shpërndarjen e fondeve bëhet plotësisht në baza vullnetare nga një ekip profesionistësh të diasporës, i cili angazhohet pa përfitime personale, me përgjegjësi dhe transparencë. Lexo më shumë për ekipin si më poshtë.
  • Afati kohor
    Fushata për mbledhjen e fondeve për Bursën “Sevasti Qiriazi” ka nisur më 22 dhjetor 2025. Më poshtë janë etapat kryesore të programit:

    • Janar–Prill: Mbledhja e fondeve
    • Maj-Qershor: Aplikimet nga të interesuarit
    • Korrik: Përzgjedhja e përfituesëve
    • Gusht - Shtator: Dhënia e bursave
    Objektivi ynë është që ky të jetë një program vjetor që përsëritet dhe rritet me kohën, bazuar në besim, rezultate dhe angazhim të komunitetit.
  • Çfarë ndodh pas bursës?
    Pas marrjes së bursës, synimi ynë është që përfitueset të kenë akses edhe në mentorim dhe në një rrjet profesionistësh nga diaspora për t’i ndihmuar të orientohen më mirë në studime dhe në hapat e parë profesionalë.
    Ne do të mbajmë kontakt të rregullt për të ndjekur progresin akademik dhe për të kuptuar impaktin real të bursës. Në afat të gjatë, synojmë të krijojmë një komunitet përfituese-"alumni", ku çdo studente e mbështetur të bëhet frymëzim dhe, me kohë, edhe mbështetje për të tjerat.
  • Bashkohu
    Ky program burse është ndërtuar mbi bindjen se arsimi i vajzave është investim shoqëror afatgjatë. Çdo studente e mbështetur ka potencialin të ndikojë përtej vetes, në familje, komunitet dhe në fushën ku do të kontribuojë profesionalisht.Ne synojmë të krijojmë ndikim të prekshëm dhe të matshëm, studente pas studenteje, vit pas viti, me transparencë dhe vazhdimësi.
    Mbështete këtë nismë duke dhuruar ose duke e shpërndarë fushatën me të tjerët.

Një komb nuk mund të ecë me një këmbë [duke lënë vajzat pas].

Sevasti Qiriazi


Një komb nuk mund të ecë me një këmbë [duke lënë vajzat pas].

Sevasti Qiriazi

Bursa Sevasti Qiriazi
Kronologjia e aplikimit dhe shqyrtimit të aplikimeve
  • 02 Prill - 30 Qershor
    Afati i aplikimeve
    Afati i aplikimeve hapet në Prill 2026.
    Kandidatet që plotësojnë kriteret e bursës mund të aplikojnë duke dërguar dokumentacionin e kërkuar online në adresën tonë bursa@diasporaofalbania.com, ose duke zgjedhur opsionin "apliko për bursë" te faqja jonë e webit.
    Këshillojmë të interesuarat të ndjekin rregullisht faqen dhe kanalet tona të komunikimit për njoftime dhe përditësime lidhur me hapjen e aplikimeve dhe hapat pasues të procesit.
  • 30 Qershor
    Mbyllja e aplikimeve
    Kjo është data e fundit për dorëzimin e aplikimeve për bursën. Deri në këtë datë, të interesuarat duhet të kenë dërguar në adresën përkatëse të gjithë dokumentacionin e kërkuar, në mënyrë që aplikimi të konsiderohet i plotë dhe të kalojë në fazën e shqyrtimit.
  • 01 Korrik-24 Korrik
    Shqyrtim i aplikimeve
    Pas mbylljes së afatit të aplikimeve, të gjitha dosjet e dorëzuara do të shqyrtohet nga këshilli mbikëqyrës.
    Çdo aplikim vlerësohet mbi bazën e:

    • meritës akademike
    • nevojës ekonomike
    • motivimit personal dhe qartësisë së qëllimeve

    Gjatë këtij procesi, komiteti mund të kërkojë informacion ose dokumentacion shtesë, nëse kjo është e nevojshme për të marrë një vendim të drejtë.
  • 27 Korrik- 31 Korrik
    Intervista
    Aplikantet që kalojnë fazën e parë do të kontaktohen për sqarime dhe intervista të shkurtra.
    Intervista është një fazë shtesë dhe selektive e procesit të përzgjedhjes, e cila përdoret nga këshilli mbikëqyrës për të kuptuar më mirë motivimin, qëllimet dhe rrethanat e aplikantes.
    Intervistat do të zhvillohen online.
    Jo të gjitha aplikantet do të ftohen në intervistë. Ftesa për intervistë do të thotë se aplikimi është vlerësuar pozitivisht dhe ka kaluar fazën fillestare të shqyrtimi.
  • 07 Gusht
    Shpallja e përfituesve të bursës
    Pas shqyrtimit të aplikimeve dhe të intervistave, komiteti mbikëqyrës merr vendimin përfundimtar mbi përfitueset e Bursës “Sevasti Qiriazi”. Vendimmarrja bazohet në një vlerësim të plotë të meritës akademike, nevojës ekonomike dhe motivimit personal, duke synuar drejtësi dhe transparencë maksimale.
    Në përputhje me parimet e privatësisë, emrat e përfituesëve publikohen vetëm me pëlqimin e tyre, ndërsa për publikun dhe dhuruesët do të ndahet informacion i përgjithshëm mbi numrin e bursave të dhëna dhe impaktin e programit.

  • Dhënia e bursës
    Dhënia e bursës periudhën Gusht – Shtator, përpara nisjes së vitit akademik.

    Përfitueset do të njoftohen zyrtarisht dhe mbështetja financiare do të akordohet në përputhje me nevojat individuale të secilës studente dhe kërkesat e institucionit universitar përkatës.

    Procesi i dhënies së bursës menaxhohet nga ekipi koordinues dhe këshilli mbikëqyrës, duke garantuar përdorimin korrekt dhe transparent të fondeve, si dhe komunikim të qartë me përfitueset gjatë gjithë procesit.
Ekipi Kordinues
Një ekip i vogël, por i përkushtuar profesionistësh dhe vullnetarësh nga diaspora që punon për ta bërë këtë bursë realitet.
  • Xheorxhina Poçi
    Anëtare
    Xheorxhina ka përfunduar studimet në Gjermani, ku jeton prej 6 vitesh dhe punon si inxhiniere ndërtimi. Në kohën e lirë angazhohet aktivisht në organizata joqeveritare shqiptare dhe gjermane, si dhe në shumë projekte sociale. Ajo beson se secili duhet të kontribuojë dhe të ndihmojë jo vetëm në shoqërinë dhe komunitetin ku bën pjesë, por mbi të gjitha për atdheun e tij.
  • Alban Alla
    Anëtar
    Albani jeton me familjen e tij prej 10 vitesh në Bernë, Zvicër.Ai është një profesionist në fushën e ICT-së.Albani e do Shqipërinë dhe është i bindur se ne shqiptarët mund të kontribuojmë, sado pak, për të ardhmen e kombit.Vajzat janë e ardhmja e kombit, prandaj ai mendon se ky hap i vogël sot do të krijojë diçka të mrekullueshme për të ardhmen.
  • Devis Cami
    Anëtar
    Devisi jeton & punon në Gjermani prej shumë vitesh dhe lidhjen me Shqipërinë e të ardhmen e saj e ka konsideruar gjithmonë të rëndësishme. I bindur se e ardhmja e Shqipërisë është pazgjidhshmërisht e lidhur me një arsimim të denjë e gjithëpërfshirës, ai angazhohet nga Diaspora me qëllimin për të ndikuar modestisht por drejtpërdrejtë për mundësi më të barabarta edukimi.
Këshilli Mbikëqyrës
Roli i këtij ekipi është të sigurojë që procesi i përzgjedhjes dhe dhënies së bursës të zhvillohet në mënyrë të drejtë, transparente dhe në përputhje me misionin e programit.
  • Riselda Kodra
    Anëtare
    Riselda punon dhe studion në Zvicër. Pas studimeve Bachelor në Stamboll për inxhineri elektronike, ajo kreu masterin në EPFL, Zvicër. Gjatë asaj periudhe punoi si kërkuese në fushën e teknologjisë në ESL, laboratorin më të madh të universitetit, për të financuar studimet e saj. Tani po kryen doktoraturën në të njëjtin laborator mbi temën “Hardware-Software Co-Design”.Duke ditur sfidat a financimit te arsimit, ajo e sheh këtë bursë si një mundësi për të mbështetur vajzat shqiptare, që si ajo, vlerësojnë thellësisht shkollimin dhe janë të motivuara ta ndjekin pavarësisht vështirësive.
  • Arben Hoxha
    Anëtar
    Arben Hoxha jeton dhe punon dhe Zyrih,Zvicër!
    Ai eshte pedagog i kitarës. Lidhjen me Shqipërinë e ka mbajtur gjithmonë nëpërmjet muzikës dhe pedagogjisë. Gjithashtu eksperienca e tij në bordin drejtues të “Freie Musikschule Zürich” e shtyn të bashkohet të vënë në jetë nismë për ta kthyer në një projekt me vazhdimësi. Arsimi është rruga për një të ardhme të qëndrueshme!
  • Stavri Pashko
    Anëtar
    Stavri jeton dhe punon prej vitesh në Suedi, por lidhja me Shqipërinë ka mbetur gjithmonë e fortë. Me përvojë në qeverisje, menaxhim rreziku dhe qëndrueshmëri, ai beson se ekspertiza e diasporës ka vlerë reale vetëm kur kthehet në veprim konkret. Angazhimi i tij në këtë bursë vjen nga bindja se arsimi është një nga mënyrat më të drejtpërdrejta për të krijuar mundësi, për të ndërtuar pavarësi dhe për të sjellë ndryshim afatgjatë.
Sevasti Qiriazi
Mbështetni studentet e talentura që vijnë nga familje me të ardhura të ulëta. Ne mbështesim të rejat me ndihmë financiare, udhëzim dhe një rrjet profesional, duke u hapur rrugën drejt arsimit të lartë.
Mbështetja juaj, fjalët e tyre nesër
Support education
Empowering young women through financial aid, mentorship, and networking opportunities. contribute and make a difference
Contact us:
bursa@diasporaofalbania.com

Close
Be the first to know our news!
Made on
Tilda